Гэртээ тохирох зөөлөн дэвсгэрийг хэрхэн сонгох вэ?
Хивс болон зөөлөн дэвсгэр бол гэрт зайлшгүй байх шаардлагатай чимэглэлийн нэг юм. Гэрийн хоосон зайг дүүргэхээс гадна дулаан уур амьсгал нэмж, мөн эзнийхээ сонирхол, зан аашийг илэрхийлж байдаг. Загвар хэмжээ, өнгө үзэмж гээд сонголт ихтэй, гэхдээ гэрийн засвар, тавилга, электрон бараа гэх мэт зардлуудыг тооцсоны дараа дэвсгэр авахаар үлдэх мөнгө бас л хязгаартай. Ийм тохиолдолд хэрхэн гэртээ таарах тэрхүү чимэглэлийг сонгох вэ? Үүнтэй холбоотойгоор бид таньд зөөлөн дэвсгэрийн талаар хэдэн зөвлөмжийг хүргэж байна.
Зөөлөн дэвсгэр сонгохдоо анхаарах зүйлс.
Байрлуулах газар, хэмжээ
Ихэвчлэн 2.7м ихгүй хэмжээтэй буйдангын урд 1.7 x 2.4 м хэмжээтэй зөөлөн дэвсгэр тохиромжтой, үүнээс илүү том буйдан бол 2м x 3м хэмжээтэй нь таарна. Мөн гэрийн бусад бага хэмжээтэй зайд зөөлөн дэвсгэр тавих боломжтой байдаг. Жишээ нь: орны хажууд эсвэл хөлд нь, жижиг хэмжээтэй ойролцоогоор 90см x 160см зөөлөн дэвсгэр байрлуулвал зохимжтой. Ихэнх хүмүүс өрөөгөө сонгодог харагдуулахын тулд том хэмжээтэй хивс болон зөөлөн дэвсгэр авч илүү зардал гарган дээрээс нь зарим хэсгүүд нь том тавилга доор дарагдан хэрэглэгддэггүй, харин түүний оронд яг хэрэглэгддэг хэсэгтээ тааруулсан хэмжээтэйг байрлуулвал таны эдийн засагт илүү хэмнэлттэй байх болно.
Гэрийн тавилгандаа тааруулж зөөлөн дэвсгэрний өнгөө сонгох хэрэгтэй
Таны гэрийн тавилганы өнгө хэр тодорч харагдах нь зөөлөн дэвсгэрний өнгөний сонголтоос ихээхэн шалтгаална. Ихэнх хүмүүс зөөлөн дэвсгэр авахдаа даруухан өнгө сонгодог. Үүнд бор, цайвар бор, цагаан болон хар гэх мэт. Эдгээр өнгө гэрийн тавилгатай ямар ч тохиолдолд зохицдог.
Гэхдээ та зоригтой сонголт хийн зочны өрөөндөө улаан, оюу ногоон, алтан шар өнгийн зөөлөн дэвсгэрүүдийг зэрэгцүүлээд тавибал мөн л дажгүй сонголт шүү. Тод хүчтэй өнгөтэй зөөлөн дэвсгэр сонгох нь гэрийн уур амьсгалыг өөрчлөхөд ихээхэн тус болдог.
Зөөлөн дэвсгэр худалдаж авахдаа бодит хэмжээг өөрийн нүдээр хараарай
Зөөлөн дэвсгэр өлгөсөн үедээ бодит хэмжээнээсээ илүү том, өргөн, урт харагддаг. Тиймээс худалдаж авахдаа газарт тавьж өөрийн нүдээр харан, сонголтоо хийвэл илүү дээр байдаг. Энэ нь таньд зөв хэмжээтэй зөөлөн дэвсгэр сонгоход туслана.
Хүүхдийн өрөөнд тод өнгө зохимжтой
Хүүхэд ихэвчлэн газар дээр тоглож гүйж харайх дуртай байдаг, хатуу хүйтэн шалыг бүрхэж зөөлөн дэвсгэр байрлуулсанаар хүүхдэд илүү тухтай орчин бүрдэж өгдөг. Дээрээс нь дуу чимээг өөртөө шингээж, цуйрайтахаас хамгаалдаг. Тод өнгөлөг өнгө сонгох нь хүүхдийн сонирхолыг өдөөдөг давуу талтай.
Ванны өрөөнд
Ванны өрөөнд усанд ороод гараад ирэхэд гишгэхэд тохирсон, ус авдаг даавуун материалтай, хальтарч гулгахаас хамгаалсан доод талдаа резинтэй байвал тохирхомжтой.
Бидний өгсөн бяцхан зөвлөмжийг уншсан таньд баярлалаа. Амжилт хүсье.